أعترف بإني برغم القوة اللي كانت فيني والإصرار والارادة القوية على اني أحقق هدفي وبرغم الإنجاز اللي انجزته ، انهزمت واستسلمت لفترة طويلة نسيبا للمرض ..
فترات متقطعة اتعب شهور وأتعافى واسترد صحتي شهر بالكثير وارجع اتعب من جديد ~ الحمدلله على كل حال فترات وعدت والحين باقي اثر بسيط لها لكن بعون الله وبإذن الله هذي الرجعة الاخيرة والثابتة للنهاية وللأبد باْذن الله ..
بسبب ظرف خاص تعبت نفسيتي وصرت احرم نفسي من الأكل لا إراديا ،، وبالفترة هذيك كان الوزن ثابت عندي لان الجسم يصير يقاوم الجوع ويخزن أي أكل يدخله بعدين تعبت بسبب قلة الاكل كل عضلات جسمي وعظامي صاروا يوجعوني لدرجة احس كأني طايحه من فوق عمارة اعوذ بالله كيف كانت هذيك الفترة مثل الجحيم ... وبالتحاليل والأشعة والمواعيد الكثيرة اكتشفت انه كان فيتامين دال ناقص بشدة عندي وهذا بسبب سوء التغذية .. بالاضافة طبعا لأننا مانتعرض مباشرة للشمس للأسف ، طبعا بدأت فترة العلاج و((((انتبهوا ياللي عندكم نقص في فيتامين د لما تبدؤون كورس العلاج لاااااااازم تشيكون على الكالسيوووووم لايصير فيكم مثلي))))
لما بدأت اتحسن الحمدلله وأتعافى فجأة انتكست صحتي للأسوأ وبعدين بعد التحليل عرفت ان فيتامين د صار ممتاز طيب وش السالفة ليش التعب رجع !!!
السبب إن الكالسيوم صار منخفض جداً لان نقص فيتامين د يؤثر على الكالسيوم يصير مهما اخذت من مصادر للكالسيوم في غذائك ماراح تستفيدون منه إلا بالحبوب لازم تاخذون الإثنين فيتامين د وحبوب الكالسيوم وللأسف دكتورتي كانت ضعيفه بهالأمور وماعندها خبرة لأنها طبيبة عامة وحولت على أخصائي عظام ومفاصل الحمدلله لقيت تحسن عنده الله يجزاه خير .. في مستوصف الحياة اسمه دكتور مسعد سنوني
بعد كذا لما تحسنت الحمدلله رحت أعمل تحاليل عشان أتطمن وأختكم في الله كانت مشدودة أعصابها بسبب مشكلة كانت صايرة بالدوام وسحبت مني الممرضة دم وبعدين حسّيت بدوخة وجت الممرضة تقول لي تعالي ع سرير المريض وأول ماحطيت رجلي على درج السرير أغمى علي وطحت على طرف السرير وضربت ركبتي على حافة الدرج!!!!! وبعدها صارت عندي إصابة بالركبة السليمة (الحمدلله على كل حال) صار عندي التهاب بالركبة واحتكاك وصرت عايشة ع المسكنات والله يعين والله يطلع صوت بركبتي كل ما أثنيها مثل صوت الخس لما يتكسر ولا يروح للآن موجود ،، حاليا أخذ كورس علاج لترميم مفصل الركبة ويارب خير لي إلى الان حوالي خمس شهور بس حاليا بدأت أتقبل الوضع واعتاد على الوجع وصوت الاحتكاك بالركبة والله كريم ❤️ بس الحمدلله احس فيه تحسن مع التمرين وأهم أهم أهم شي التعب النفسي والعذاب النفسي اللي كان ذابحني راااااح الله يديم راحة البال علي يارب ولا يوريكم اللي شفته يارب .. ❤️❤️
لكن الحمدلله اللي قدر ولطف وبقدر الإمكان كنت احاول أوازن بأكلي عشان وزني كل مازال رجعت ضبطت آكلي ونزلته بقدر الإمكان وعلى هالحال طبعا المشي والرياضة انحرمت منها كثييييير صرت اذا رحت الممشى البنات يسلمون علي وفقدناك ووينك بس الشكوى لله،،
الخلاصة :
{{زاد وزني ١٥ كيلو خلال سنة وثمان شهور تقريبا من ٩٢ إلى ١٠٧ }}
لكن أنا قدهاااااا وأنا أقدر وماسميت نفسي I can do it عبث أنا فعلا أقدر أعملها وأحقق هدفي وثقتي بربي قبل نفسي كبيرة ❤️
وهذي أنا رجعت لكم من جديد اقول لكم قصتي كنوع من الفضفضة وكمان هدفي الأول والأخير إني أفيدكم ويارب يارب ياااارب مايصيب أحد منكم ما أصابني الحمدلله إن الله إذا أحب عبدا ابتلاه وهذا إبتلاء وأنا راضية فيه وبفضل الله تجاوزت اللي حصل وماراح أسمح لأي شي يضعفني لأن هالتجربة علمتني أكثر وأكسبتني من الخبرة أكثر والحمدلله حمدا كثيرا اللي فضلني على كثير من عباده واختارني بهذا الاختبار ❤️❤️❤️
وبس
أعتذر على الإطالة*
❤️محبتكم للأبد آي كان❤️
Twitter: @i_can86
Instagram: ican86diet
ليست هناك تعليقات:
إرسال تعليق